Noticia express: "Investigación nos invernadoiros de Vilariño"

Despois dun loooongo descanso, volven os boletíns de novas express da biblio de Estrela.
Nesta ocasión as/os nosas/os reporteiras/os investigan a pé de invernadoiro. 
Non deixedes de ler esta interesante noticia pinchando na imaxe.

Festa científica na biblio de Estrela

Este ano celebramos o mes da ciencia en galego a base de ben.

Montamos o noso recuncho científico na biblio (que tivemos que desmontar a toda presa polas obras, pero esa é outra historia que xa contaremos), investigamos sobre as científicas galegas... pero sobre todo adicámonos en corpo e sabiduría a facer experimentos.

Que se método científico, que se hipótese, que se variable, que se Galileo...

Total, que rematamos con todas as existencias de vinagre e bicarbonato da comarca.

Gravamos multitude de vídeos experimentando que colgaremos no blog nada máis sexa posible e...

como remate deste longo mes que xa se convertíu en dous....

IMOS CELEBRAR UNHA FESTA CIENTÍFICA NA BIBLIO.

Prepara o teu experimento favorito, vístete para a ocasión e compárteo con todas as/os compis do cole.

Vai ser un acontecemento mundial!!!

Vémonos o día 21 na biblio.

Que emoción!!!

Bicos experimentais

ESTRELA

Programando colegas

Ola rapantiñ@s.

Como xa sabedes, na área de Educación Física estivemos coa linguaxe de programación ás voltas.

Como sempre dicimos, a parte do corpo que máis temos que usar nesta área é o cerebro e abofé que estas sesións serviron para poñelo ben cachas!!!

Para facer máis doados os procesos de entender, interpretar e transmitir as mensaxes deste novo código robótico que mellor que vivencialo primeiro no noso propio corpo!

Aproveitamos os cadros do maltreito chan do noso ximnasio e o material de Educación Física para deseñar circuitos e logo trazar roteiros cumplindo as consignas dadas.

Ao primeiro custounos un pouco, pero a correr collémoslle o xeito.

Ata programamos ás nosas/os colegas-robot para facer un feixe de accións novas!

Aquí deixo un vídeo resume destes días.

Agardo que vos guste.

Bicos programados

ESTRELA

Bibliotecari@s con chip. Xogando cos escornabots na biblio.

Ola, choquiñ@s.

Seguimos ás voltas cos nosos escornabotiños.

Pensamos que sería unha idea estupenda ensinarlles toda esa leria da CDU e a organización da biblio.

Como son tan listos, seguro que o pillan á primeira e axiña poderán facerse cargo da tarefa de colocar cada cousa no seu sitio!

Aquí déixovos un vídeo da actividade desenvolvida co alumnado de 4º coa axuda inestimable das/os axundantes de 1º.

Tamén podedes descargar os taboleiros de xogo e consultar a ficha didáctica aquí:

Agardo que vos guste.

ESTRELA

Boas novas! Moitas!

Ola, linguachiñas/os.

Estes días estamos moi contentas e contentos no cole de Vilariño porque asomaron o fuciño novas marabillosas para toda a comunidade.

A primeira é que gañamos o 

Concurso Nacional de Buenas Prácticas en centros docentes educativos

cunha dotación de nin máis nin menos que 10 mil euros!! Que grande axuda para seguir mellorando!!

Pero a cousa non rematou aí, a Biblio de Estrela foi seleccionada para entrar no programa

A radio na biblio

que nos aportará máis formación para as docentes e 2 mil euros para invertir na biblioteca.

Por se isto fora pouco, o Concello de Cambados, a través de Víctor Caamaño, concelleiro de Educación, elixíu a nosa Radio Estrela para presentar a segunda edición do Curso  "Creación dunha televisión e radio escolar en Cambados", á que asiste unha boa representación do claustro do noso cole.

Que orgullo!

Veu acompañado de Xoán Leira, director de devandito curso a atender aos medios de comunicación.

Pero as nosas reporteiras e reporteiros de quinto non quixeron deixar pasar a ocasión de facerlle unha entrevista.

Próximamente poderedes escoitala na nosa canle de ivoox

Xa vos podemos adiantar que foi moi interesante e profesional!

O señor Caamaño interesouse polas melloras que veñen de executarse nestes semanas na nosa biblio (o cambio dos teitos polo que tanto piamos) e comprometeuse a que o Concello completará o acondicionamento dos dous espazos.

Confiamos en que así será!!

Bicos redelísimos,

ESTRELA

É maxia? Non! É ciencia!

Neste mes de novembro, o da ciencia en galego, equipos de renome universal, todos eles (que casualidade!) estudantes do cole de Vilariño, prepararon experimentos que nos deixaron a todas coa boca aberta,

Parece maxia, pero non! É ciencia!

Irémolos colgando nesta entrada para que alucinedes.

O ovo saltarín

Aboia ou afunde?

A masa especial

Bicos máxicos científicos

ESTRELA

Honrando ás mulleres científicas galegas no 25 de novembro.

Así de fermoso quedou o mural adicado ás mulleres científicas galegas que colocamos na entrada no cole.

Con el queremos honrar e visibilizar o labor destas investigadoras.

E tamén animar ás nosas alumnas a que emprendan o camiño da ciencia, se elas queren.

Porque, a pesar de todo,  as rapazas tamén somos de ciencias.

        

Bicos honrosos

ESTRELA

Montando o escornabot

Como parte da comunidade das Bibliotecas Creativas, comprometémonos a compartir os materiais didácticos que imos xerando.

Aquí tendes un vídeo explicativo de como montar un escornabot.

Polo de agora temos catro, pero agardamos que axiña medre a nosa familia cibernética!

Que traballiño deu, mimadriña! (o vídeo, o do robot está chupado).

Gozádeo e a escornabotear!

bip bip

Estrela

   

25 de Novembro. Vilariño contra as violencias machistas

Ola, augamares.

O vindeiro 25 de novembro, como todos os anos, conmemoraremos o 

Día Internacional contra as violencias machistas.

Distintas organizacións, como a Marcha Mundial das Mulleres, e organismos, como o Concello de Cambados, organizan actos reinvindicativos.

Porque as violencias machistas son un grave problema na nosa sociedade ao que temos que poñer solución urxentemente.

No cole de Vilariño, por suposto, queremos formar parte deste movemento, pero... sabemos realmente de que estamos falando? 

Que entendemos por violencia contra as mulleres?

Seguramente, ao pensar sobre o tema, veñan ás nosas mentes novas terroríficas que atopamos nos medios de comunicación.

Entón, se non o vivimos en primeira persoa na nosa familia ou no noso entorno  é doado que pensemos que é un problema terrible, si, pero lonxano.

Pero, desgrazadamente, existen outras formas de violencia que nos arrodean a cotío e que moitas veces nin sequera detectamos.

Porque na nosa sociedade o machismo ten tal raigame que se non nos poñemos a reflexionar sobre el, case pasa desapercibido

Machismo!

Escoitamos esta palabra continuamente.

E nós... sabemos o que significa?

Pois premede aquí, a ver que din as sabias e os sabios da lingua.

Tantos séculos con este pensamento predominante, son complicados de virar.

Pero para iso naceu outra ideoloxía, o feminismo, queredes saber o que é? Pois é doado, premede aquí.

E diredes vós, bah, Estrela, iso do machismo é cousa do pasado.

Agora, por sorte, a nosa sociedade evolucionou e está superado.

Tendes razón, grazas ao movemento feminista e as súas reinvindicacións, moitas cousas foron mudando, pero quedan tantas outras por superar....

Vouvos poñer un exemplo:

Este mes de novembro vimos celebrando o mes da ciencia en galego, vai que si?

E investigamos moito e coñecimos a autores e autoras de referencia, non?

Si?

Estades seguras/os?

Atopades tantas autoras como autores?

Veña, imos facer a proba: dicide, así a correr, 5 homes que pensedes que contribuiron ao desenvolvemento da ciencia.

Vale, moi ben. Vese que prestabades atención.

E mulleres?

Ademais de Marie Curie que a coñecen ata en Plutón... esforzádevos un pouco máis, vai!

Ahhh, que non é tan doado, non?

E por que pensades que vos custa? Será que non as hai?...

Hummm...

E galegas?

- Ai, mimadriña, iso xa é imposible!

Pois aínda que vos soe estraño, acabades de topar outra forma de violencia sobre as mulleres.

Porque violencia non é só cando nos fan dano físico.

Violencia tamén é cando nos apartan, cando nos aldraxan, cando nos silencian, cando din que non somos quen de facer algo, cando deciden por nós.

Violencia é cando nos impiden ser quenes queremos ser e póñennos obstáculos somentes polo feito de ser mullleres, 

Violencia tamén é o silencio consentidor, é mirar para outro lado.

E en Vilariño non  imos facer iso, colaborar co silencio.

Pois nada, como non hai carta sen agasallo ou proposta.....

Aí van os do 25 de novembro.

O agasallo:

Xa que cremos firmemente na educación e a cultura como a mellor arma para construir unha sociedade igualitaria, téñovos preparado un recunchiño no que poderedes topar obras sobre mulleres poderosas e marabillosas que contribuiron a cambiar o mundo.

Tamén historias e contos que nos fan pensar sobre todo este asunto do machismo e o feminismo.

O recuncho feminista da nosa biblio non deixa de medrar. Aquí tendes unha selección de obras sobre científicas.

Pero, se vos fixades, a meirande parte das obras nin están en galego nin tratan sobre científicas galegas.

Ai, rediola! Será Galicia un país sen científicas?

E quen ven sendo esta muller?

Pois haberá que ver que pasa, non?

Si, adiviñastes, aí vai a proposta:

Que vos parece se poñemos luz sobre a vida e o traballo de científicas galegas que contribuiron á evolución do saber e os seu nomes e logros foron silenciados?

Investigade sobre elas, como se chaman, cal é o seu rostro , cal  o seu legado, con que dificultades se toparon.

Cos vosos achádegos comporemos un mural na entrada do cole para honralas.

Vai ser fantástico!

Aquí déixovos uns cantos enlaces para que podades empezar a traballar.

Mulleres científicas galegas

Álbum da ciencia. Consello da Cultura Galega

Álbum das mulleres. Consello da Cultura Galega
Axenda feminista. Observatorio da Mariña pola igualdade.
Traballo na USC para visibilizar mulleres científicas na Galipedia.
Científicas galegas. Publicación sindicato STEG para o día da ciencia en galego.

100 mulleres galegas. Xunta de Galicia.

Mentres investigades, podedes debatir na clase e compartir no blog todo aquelo que vos chame a atención.

Só unha cousa máis: onde ides automaticamente cando queredes buscar información de algo?

- Que pregunta, Estrela, á Wikipedia

E lembrades que hai unha wiki en galego, a Galipedia? 

A cantas das científicas galegas que descubristes podedes atopar nela?

Facemos algo por remedialo?

Bicos feministas

ESTRELA

Radio Estrela está nas ondas!

Por fin inaguramos a nosa canle de radio en ivoox.

Un comando de axudantes de Estrela,  gravaron o podcast de estrea.

Falaron Noa, Carolina, Simón e Mario. Controlaron a técnica Ainhoa e Sara. Fixérono fenomenal!

Queredes escoitalo? Dádelle ao play!



Pero esto só é o principio.

Subscríbete á nosa canle e goza dos moitos programas que están por vir!

Bicos iniciáticos.

ESTRELA

A radio da biblio de Estrela: probando, probando

O novo recuncho da biblio xa non é un misterio.

A boa nova foi pasando de boca a orella por toda a parroquia.

Xa é difícil atopar en Vilariño algúén que non saiba que cos cartiños do premio do Concurso de Proxectos montamos....

UNHA RADIO!!!!!!

(se ti eres das/os que non o sabía, hummmmm, vés a visitar este blog menos do que deberías!!!!!)

Pero, claro, ninguén nace aprendido e as mestras desta escola están a poñerse ao día nos regredos radiofónicos nun tempo record.

A de actividades marabillosas, divertidas, interesantes e emocionantes que están por chegar!!!!

Para isto, contan co mellor mestre, Javier Prado, que  visitou a biblio acompañado de Luis Losada, un dos pioneiros da radio escolar na nosa contorna.

Aquí tendes algunhas imaxes da primeira xornada de apredizaxe.

Como disfrutaron estas docentes!

Estas semanas, a nosa radio estará en fase de probas.

Algúns grupos xa pasaron a ver que se sinte cos auriculares postos e o micrófono diante.

O grupo de cuarto preparando un noticieiro

E traballando no estudo de gravación

O grupo de terceiro preparou un programa de contos de medo.... que vén aí o Samaín!!

Nas vindeiras xornadas seguiremos coa  fase de probas, pero.....

ATENTAS!

Pronto teredes novas da inaguración da radio da biblio de Estrela.

Bicos nas ondas

ESTRELA

Invasión robótica na biblio de Estrela!

VIVA! VIVA! VIVA!

A biblio de Estrela foi admitida no programa 

BIBLIOTECA CREATIVA!!!

E iso que vén sendo?

Pois que seguimos mellorando, agora cun recuncho de robótica.

Aprenderemos a programar e quen sabe... a ver se rematamos fichadas pola ESA

Permanecede atentas e atentos!

Axiña teredes máis novas!

En marcha!

Ola solliñas.

O vindeiro luns 1 de outubro arrancamos!

Podedes vir á biblio 

• todos os recreos
• polas tardes, de 16 a 18h (agás os martes)

Agárdovos!

Quen será, será?

Ola, lorchiñ@s.

O vindeiro mércores imos recibir na biblio unha visita sorpresa.

E diredes vós: menuda sorpresa, Estrela, estalo dicindo!!!

Ah, pero a min gustame moito o suspense, xa sabedes. Polo tanto, non vou arriar todos os datos así ao tolo.

Ides ser vós quen teredes que ir investigando para atopalos.

Buscade as solucións e contestade no blog, nos comentarios desta entrada.

A de papel que imos aforrar e o animado que vai estar isto!

A ver, a ver.... Quen é esa persoa que vén á biblio?

Aí van un par de pistas:

Estaban gravando unhas booktuberiñas de primeiro e enterámonos de que a autora do libro do que ían falar estaba de aniversario xusto ese día!! Que casualidade!!!

E pensaron: imos mandarlle unha felicitación

Esta muller tan simpática e amable veu o vídeo e enseguida púxose en contacto comigo para dicirme que viña correndo a ver a famosa biblio de Estrela e agradecer en persoa un detalle tan fermoso.

Ao mellor non a vistes nunca, por eso poño aquí esta foto con tres das súas obras.

Que? Xa averiguastes o seu nome?

Seguinte pregunta: escribíu seis adaptacións de contos. A ver se sabedes cales son. 

Que siiii, que siiiii, que poño unha piiiiista

Ah, que non se ve o título? 

Claro! Fixen algo de trampa, non volo ía poñer tan doado....

Buscade, buscade... e agora dicídeme.... cantos destes libros temos na biblio?

Como podedes sabelo? Pois consultando o catálogo.

A por outra pregunta!

A nosa visitante tamén é unha grande admiradora de María Victoria Moreno. Con ela ten moitas cousas en común.

Vou poñer unha chea de datos e vós deberedes dicirme se corresponden á escritora misteriosa, a MVM ou a ambas.

Preparad@s? Imos!

Escribe en galego	As súas obras foron traducidas a moitos idiomas	É tradutora
Montou unha libraría	Traballou de editora de libros	É mestra
Estudou xornalismo	Organiza o salón do libro de Pontevedra	Ten unha camisa caqui
Ten gafas	Prefire a literatura para nen@s	Non é de Pontevedra, pero elixíu esa cidade para vivir
Naceu en Sanxenxo	Está viva	Viaxou por medio mundo

Que queredes unha pista?

Veeeeña, aí vai 

Quen é quen?

Polo seu traballo, misteriosa, viaxou por moooooooitos países, máis ou menos tantos como Willi Fog.

Poderíades averiguar en cantos puxo o pé?

E para rematar.... que día mandamos o vídeo de felicitación? 😉

Veña, bulide, tendes de prazo para investigar ata o martes ás 14 horas.

O tempo comezaaaaaaaa xa!

Bicos detectivescos

ESTRELA